La pregiera de l'espeleò
de Ralph Parrot, adaptat en perigòrd (pus o mens) doblaud per Gaby Balloux
Mon Diu, m'avetz botat dins 'queu terrestre monde
Onte pòde espiar lo ciau blu, l'univers
E ai chausit lo gorg e la cròsa prigonda
Onte los vielhs vesián las bochas de l'infern
L'abisme es clafit d'esplendors estujadas
Que dins l'escuresina làusen vòstre nom
E 'queu-'quí que s'enauça a las voutas nibladas
Se retròba jos terra pitit coma un cusson
Mon Diu, avetz fach de las beutats daus crosets
La sanccion dau risque e lo pretz de l'esfòrç
Gardatz-me, io tan freule, en 'quilhs paurós endrechs
Onte darrier la patz es daus-uns-còps la mòrt
Gardatz-me de l'onda e de son brusque corrent
De la còrda que romp, dau fuòc que s'eschantís
De la crampa, de l'eija e de l'esbolhament
Daus tracanards de l'ombra e dau ròc coladís
E quora enfin, per io, l'ora sirá
'ribada
De me'n anar tanben vers lo país d'en naut
Aiatz pietat, Senhor, de mon ama esgarada
E recebetz chas vos lo paubre "chava-traucs"
Commentaires
Enregistrer un commentaire