Pradelada dins los Monts de Blom (lemosin en grafia classica) / Pradelado dins lous Mounts de Bloum (lemouzi en grafìo felibrenco au dessous)

 

 

Sabetz queraque que lo Lemosin es un país siclat sus lo vielh Massiu Ercinian, una taula de granit e de ròchas que los geològues disen « metamorficas » (gneiss, schistes…), sus son ranvers oest qu’es pas estat renautat per lo plejament alpin. Entau, lo Lemosin es format de montanhas plan usadas, un país de bassa montanha per ben dire: daus plateus, o planetges, estatjats mai o mins de 250 a 900m emb daus pitits massius de tuquets o suquets mai nauts eissigats deçai-delai. Lo planetge lo mai conegut, qu’es segur lo plateu de Miuvachas (chafrat maitot Montanha lemosina) emb coma punt lo mai naut, lo Mont Besson que se quilha a 981m de nautor.

Mas, mai a l’oest, en ’ribar de la mar, de l’ocean, trobem los prumiers pitits massius, modestes. Entre Sent-Junian e Belac, s’enauten los Monts de Blom, país de la Mandragòra (l’i vam tornar). Los Monts de Blom son pas ben nauts puei que ponchegen a 515m mas totparier, ’visen de naut los alentorns de 200m. Qu’es daus tuquets redonds, tot en doçor, emb tot plen de bòscs que, dins l’arriera-sason, fan flambejar lo païsatge. Los monts acialen quauques borgs, aisinats sus sos costaus, coma Sius, Monteiròu, Blom o Mòrtamar. Queu massiu es tanben un país de legendas mercés a mai d’un caòs granitic e de megalites de granit coma lo rochier de Puegchaum, lo ròc de las fadas, la peira levada de Cinturac o lo ròc branlant de Boscartús. A Puegchaum, la legenda ditz que lo mai gròs rochier se duebra lo ser de Nadau e que l’i a un tresaur dedins mas que fau far regde que lo rochier se tòrna barrar viste. A Cinturac, l’usatge popular ditz que, virat d’eschina, fau lançar un calhau en arrier e que tombe sus lo rebòrd que fai la peira ficha en nautor per que se maridan dins l’annada.

 

E puei, los Monts de Blom, qu’es subretot lo país de la Mandragòra, un espaurissable dragon emb 'na testa d’òme que roinava lo país e minjava los crestians. Urosament, un coratjós chivalier ’chabet per véncer quela béstia terribla.

Aitanben, dins los Monts de Blom, trobaretz a Puegchaum ’na placa en l’aunor de Frederic Mistral, fondator dau Felibritge, que marca simbolicament la limita entre país d’òc e país d’òil, entre Lemosin e Peitau (e Berrí), linga d’òc e linga d’òil. L’endrech es simbolic que la limita passa per de verai mai au nòrd, au dessús de Belac, ente los parlars s’eslunhen dau lemosin pitit a pitit per se far mai d’òil, dins la Bassa-Marcha, dins lor prononciacion (los ’pelen los parlars dau Creissent) avant de passar aus parlars d’òil dau Peitau e dau Berrí.

 

Los Monts de Blom son un plan brave país qu’es demorat bassetz sauvatge e que rapela un país mai luenhd dins lo sud ente me sei desjà permenat, lo Massiu dau Sidòbre dins Tarn, un pauc mai naut, que ne’n parlarai benleu un autre còp. 

Signat :  Degun

Versî en grafìo felibrenco

Sabez queraque que lou Lemouzi ei un païs siclhat sur lou viei Massî Ercinien, uno taulo de granit e de rôchâ que lous geoulôgueis disen « metamourficâ » (gneiss, schistes…), sur soun ranvers ouest qu’ei pas eitat renautat per lou plejament alpi. Entau, lou lemouzi ei fourmat de mountagnâ plo usadâ, un païs de basso mountagno per be dire : dòus plateus, ou planegeis, eitatjats mai o mins de 250 a 900m end daus pitits massîs de tuquets ou suquets mai nauts eissigats deçai-delai. Lou planege lou mai counagut, qu’ei segur lou plateu de Miòuvachâ (chafrat meitout Mountagno lemouzino) end coumo punt lou mai naut, lou mount Bessou que se quilho a 981m de nautour.

Mâ, mai a l’ouest, en ’ribâ de lo mar, de l’oucean, troubem lous prumiers pitits massîs, moudesteis. Entre Sent-Junio e Bela, s’enauten lous Mounts de Bloum, païs de la Mandragôro (li vam tournâ). Lous Mounts de Bloum soun pas be nauts pei que pounchegen a 515m mâ touparier, visen de naut lous alentours de 200m. Qu’ei dòus tuquets redounds, tout en douçour, end tout ple de bôs que, dins l’arriero-sazou, fan flambejâ lou païsatge. Lous mounts acialen quauqueis bourgs, eisinats sur sous coûtaus, coumo Cî, Mounteiròu, Bloum ou Mortomar. Queu massî ei tabe un païs de legendâ mercéi a mai d’un caôs graniti e de megaliteis de granit coumo lou rouchier de Peuchaud, lou rouchier de lâ fadâ, lo peiro levado de Cinturat ou lou ro branlant de Boscartus. A Peuchaud, lo legendo dis que lou mai grôs rouchier se deubro lou sei de Nadau e que l’i o un tresor dedins mâ que fau fâ redde que lou rouchier se torno barrâ vîte. A Cinturat, l’usage poupular dis que, virat d’eichino, fau lançâ un calhau en arrier e que toumbe sur lou rebord que fai lo peiro ficho en nautour per que se maridan dins l’annado.

E puei, lous Mounts de Bloum, qu’ei subretout lou païs de la Mandragôro, un eipaurissable dragoun end ’no této d’ôme que roeinavo lou païs e minjavo lous creitiens. Urousoment, un courajous chivalier chabet per vencer quelo béitio terriblo.

Eitabe, dins lous Mounts de Bloum, troubarez a Peuchaud ’no placo en l’òunour de Frederi Mistral, foundatour dau Felibrige, que marco simboulicoment lo limito entre païs d’ô e païs d’oïl, entre Lemouzi e Peitau (e Berri), lingo d’ô e lingo d’oïl. L’endret ei simbouli que la limito passo per de 'rai mai au nord, au dessur de Bela, ente lous parlâs s’eilugnen dòu lemouzi pitit a pitit per se fâ mai d’oïl, dins lo Basso-Marcho, dins lour prounounciacî (lous pelen lous parlâs dau Creissent) avant de passâ aus parlâs d’oïl dòu Peitau e dòu Berri.

Lous Mounts de Bloum soun un plo brave païs qu’ei demourat bassez sauvage e que rapelo un païs mai luen dins lou sud ente me sei deija permenat, lou Massî dau Sidôbre dins Tar, un pauc mai naut, que n’en parlarai beleu un autre co.