Dusc’aura, las victimas de violéncias conjugalas duviàn ’nar a Garait, mas emb l’acòrd signat lo 25 de novembre entre los servicis de l’estat en Cruesa e los elegits, las victimas de violéncias conjugalas de l’oest de la Cruesa podràn èsser aculhidas, escotadas, conselhadas e orientadas en un luòc mai pròche de lor domicili.
Quò sirá ’na estructura d’acuelh que dependrá dau CCAS emb doas personas referentas formadas per queu pretzfach. Quela estructura comprendrá un bureu ante elas podrán recebre las victimas, e lors enfants si fau, e un apartament ante questas podràn lotjar si a causa de lor situacion qu’es soatable de las botar a l’abric. Quò permetrá a la justícia de trabalhar mai serenament sens èsser dins l’urgéncia, dau moment que la victima ne sirá pas mai a son domicili.
La gendarmariá de La Sostrana es implicada dins lo dispositiu puei que l’estructura aurá la possibilitat d’acompanhar las victimas dins las demarchas de depaus de planh. Questa trabalhará maitot emb las fòrças de l’òrdre per prevenir queu tipe de fachs.
Qu’es la tresesma estructura d’acuelh de quelas victimas en Cruesa, après quelas de Garait e de Borgon Nuòu. D’après l’Aresvi (Associacion de rechercha e d’estudi subre la santat, la vila e las inegalitats), mens dau 30 % de las victimas de violéncias conjugalas declaren los fachs a la polícia o a la gendarmariá.
L’acòrd signat lo 25 de novembre resulta daus engatjaments près per l’estat dins lo quadre dau Grenelle sus las violéncias conjugalas.
Article signat : Eric Gonzalès
Commentaires
Enregistrer un commentaire