Un a pas obludat lo modelon de cas de chavaus tuats dins tota la França. Qu’es un afar que d’alhors n’es pas ’chabat, e si ne l’i a pas 'gut de cas de chavaus tuats questas darrieras setmanas, quò s’explica ’n esfech per lo confinament que vivem. Malurosament, quilhs criminaus an suscitat de las vocacions en Aleir e qu’es aura un afar de vedeus tuats que far parlar los païsans dau Borbonés : en tres setmanas, quatre vedeus son estats retrobats mòrts.
La prumiera vetz, quò futet lo 7 de novembre a Saint-Ennemond, a quinze quilometres au nòrd-est de Moulins.
Lo 16 de novembre, quò continuet a Lapalisse e a Jaligny-sur-Bresbe, doas comunas pròchas au sud-est de Moulins. Un vedeu futet trobat tuat en chascuna.
En fin finala, qu’es a Eiriçon, au nòrd-est de Montleiçon, que trobeten ’na quatresma victima, ’na vedela de tres setmanas.
L’i a de las rasons de pensar que quilhs maufachs son l’òbra de las mesmas personas: chasque animau ’viá ’gut l’aurelha dreita trenchada, e los quatre crimes se son passats dins daus ranvers aluenhats de las grandas vias de comunicacion. Fai ’na granda diferéncia emb los murtres de chavaus, que d’après çò qu’an pogut establir, avenen a proximitat de las autorotas.
Los païsans de l’Aleir son preocupats. La gendarmariá dau departament mena l’enquesta.
Signat : Eric Gonzalès
Commentaires
Enregistrer un commentaire